وعدت لكم ..... اه والله

السلام عليكم ورحمة الله وبركاته

منورينن ، وفى الجنه متجمعين ، وعند الحبيب المصطفى متواعدين ،،

ولوجه ربنا بالغداوة والعشى ناظرين ،، قولوا آآمين

"....." : ياااااااااه ياست ريما أخيرا نزلتي بوست جديد دا احنا

قلنا انتي خلاص سبتينا وكبرتي دماغك من حكايه التدونين دي

_ لألألأ ازاي بس وأسيب الناس الحلوة الي هنا دي لأ طبعا مش

ممكن بس انا حبيت ان بوستي يكون ديفرنت وفعلا بوستي

النهارده غريب شوية إزاي يعني

غريب ؟؟ اصل البوست دا عني وعن الفتره الي فاتت الي مريت بيها

خليني اكلمكم بصراحه واسمحولي افضفض لكم شوية وتدوني لو

حتي 10 دقايق بس ممكن ؟ بعد اذنك طبعا يعني ..!

طبعا الفتره الي فاتت دي كانت من اصعب وأجمل الفترات الي

مريت بيها ومعظم الي بيقرأوا الوقتي عارفين اني مش دخلت نت

من تقريبا اسبوعين وع فكره القرار دا كان بإرادتي !! حاجه غريبه

مش كدا ...؟ لأ أبدا مش غريبه خالص خلينا نحكي شوية ونمسك

الخط من أوله بقينا بنسمع كتير اوي الايام دي عن المدونين

الي عايزين يسيبوا عالم التدوين والي تعب واتخنق تنيجه

لظروف خاصه او ظروف سببها وسط التدوين نفسه وتدخل مدونات

كتير اوي تلاقي موضوع ربما محتواه مش بيتغير عن الموضوع دا

ودا مش غلط أبدا ولا انا بقول أي حاجه بس الي عايزة اقوله اني

في يوم من الايام وصلت للمرحله دي وتعبت جدا ومش هقولكم ان

تعبي دا كان بسببي...! انا اكيد حملت نفسي مسؤليه كبيره لكن

عايزة اقولكم ان تعبي دا كان سبب كبير فيه كتير اوي من الي

كانوا حوليا في نفس الوسط ويمكن دا الي تعبني اكتر انهم

ناس المفروض يشدوني لفوق ويرفعوني لكنهم للاسف ....... "

انا عمري ما هنساهم ابدا لاني لسه بكنلهم كل الاحترام والتقدير

والله وبدون مبالغه ابدا ..... المهم اني النهادره مش جايه اقولكم

اني كنت تعبت لأ انا جيت أقولكم ازاي قدرت أرجع زي الاول

واحسن الحمد لله انا فضلت فتره كبيرمخنوقه وتعابه جدا وكنت

حاسه اني تايهه واقول في بالي ياريما فتره وهتعدي وكل

شيء هيبقي تمام ان شاء الله وكل يوم اقعد مخنوقه لكن

مفيش حاجه بتتغيروللاسف يتفشل كل محاولاتي لحد مافي

يوم اتعرفت ع واحده قُدر ليَّ انها تكون معايا في المشروع

وبس ومكنش حد معانا اتعلقنا ببعض اوي وعرفت عني

تقريبا كل شيء وفي يوم اتصلت عليا وقالت لي ريما عايزين

ندردش شوية قلتلها مفيش مشاكل ويوميها ضربتني ع دماغي

تعرفوا هيه الضربه كانت صعبه اوي لكنها فوأتني و نبهتني

لحاجات كتير اوي وبعد الضربة طبطبت عليه ورسمت قدامي

شريط من مبادئي وقيمي وشغلي ورفعتني عالي اوي وقالت

لي عايزين نوصل لريما الي هناك دي رجعت البيت وقعدت

افكر ياااااااااااااه ولأول مره اقعد مع نفسي من زمــــان اوي عايزة

اقولكم ان ساعتها اترسم قدامي شريط كامل من حياتي

وكل مافيها من كبيرها لصغيرها وبدأت في حاله بكاء وانهيار

غير طبيعيه ع فكره انا حالتي دي مش علشان غلط كبير انا عملته

انا غِلط فعلا لكن الي كان السبب في حالتي دي حاجات كتير

اوي كانت ضاغطه عليه وناس قريبن مني بدأت احس انهم

هيضيعوا قدامي ومش بس كدا دول كمان بدأوا يضيعوني

معاهم وللاسف كانت كل محاولاتي بدون أي نتيجه انا فضلت

تقريبا 3 ليالي حاله بكاء غير طبيعيه بالفعل غير طبيعه وبعدين

كلمت مين ؟؟ كلمت صديقتي وكنا تقريبا 2 بليل ويوميها ع فكره

كانت ليله اجتماع المدونين وانا افتكر ان في المكالمه دي انا

متكلمتش غير كلمتين وكان دور صديقتي انها تمسح دموعي

وتتكلم معايا وحسيت بحضنها رغم انها كانت بعيده عني ويوميها

حطت رجلي ع معالم الطريق وبعد 1/2 ساعه قالت لي أجمدي

كدا ياريما وانشفي يلا نقوم ونصلي ركعتين ودي تكون بداية عهدنا

واقعدي مع ربنا وحكيله ع كل حاجه وبعدين امسكي المصحف وافتحيه

علي أي صفحه بدون ما تحددي واقرأي اول آيه عنيكي تنزل عليها

وابعدي تماما عن الوسط الي مسببلك كل التعب النفسي دا لدرجة

اني لحد وقتها مكنتش عارفه اصلا انا هاجي الاجتماع ولا لأ بس انا

كان لازم أروح لأن كان في رسايل كتير اوي لازم توصل وبالفعل

عملت كل الي اتفقنا عليه وقررت البعد الفتره القادمه,,,,, طيب كتير

هيسأل ليه فتره الغياب دي ولزمتها ايه اصلا مادام ان الواحد

زي ما انتي بتقولي حط رجليه ع معالم الطريق ؟تعرفوا الفتره

دي قلبت حياتي بجد من أول خطوه عملتها

1)كانت بدايه المشوار بركعتين لله وجلسه مع ربنا انتهت بالآيه

الي نزلت عنيه عليها

احساسك ساعتها : مايتوصفش..بجد ميتوصفش لما الهم والتعب

يكتر عليك اوي وتحس خلاص انك تعبت من كتر الي انت شايله

ومن فشل محاولاتك فجأه ترمي الهم من ع قلبك يوميها انا

حكيت لربنا ع كل حاجه وقلتله يارب انا وكلت أمري ليك وانا

راضيه بقضاءك ,والله شعور براحه نفسيه رهيبه وبحلاوة قربك

من ربنا وبطمئنان لكل حاجه جايه,, وساعتها كان قدام عنيه

" أصلح مابينك وبين الله يصلح مابينك وبين الناس "

2) بعد مانفسيتي استقرت نوعا ما سافرت وهناك بدأت أرتب

اوراقي وأوراقي كانوا 6ورقات اول ورقه مسكتها وبدأت اكتب

كل ايجابيات الفتره الي مريت بيها

أما تاني ورقه فكانت لكــــــــول السلبيات والاخطاء والتجاوزات

والمشاكل الي صدرت مني او واجهتني

أما الورقه التالته بأه فكانت أكبر ورقه وبدأت احط فيها كل أهدافي

من جديد وانا ليه اصلا بدخل نت وايه هيه آليه العمل بتاعتي

وكتبت كل أهدافي وكأني بدخل ولأول مره نت ونظمت آليه

عملي مع الوسط الي انا بقيت فيه

أما بأه رابع ورقه فكانت بتضرب تحت الحزام وكان فيها كل

قراراتي والخطوط الحمرا الي همشي عليها ان شاء الله

وتكوين صورة شامله عن ريما بعد العودة

الورقه الخامسه بأه خلينا نتكلم فيها عن الانجازات ,,,,,,,,!

اصل الفتره دي مكنتش كدا وبس الفتره دي الحمد لله تميت

حاجات كتير اوي" فتره الغياب فقط يعني تقريبا 8 ايام " لأني

طبعا كنت قاعده بدون نت : 1-اتميت جزء من القرآن حفظا

2- انهيت كتاب " وعرفت يومها ان لي قلبا"

3 – بدأت تلخيص كتاب " الفجر القادم " وكتاب "تيسير الرحمن

في تجويد القرآن " 4 – الحمد لله وضعت خطة العمل النهائية

لمشروعين قادمين بدأ العمل بهم 5- تم الانتهاء من بعض الاعمال

الصوتيه التدريبه 6- أخيرا وأجمل حاجه طبعا اني صيفت وعملت

شوبنج كمان وظبط نفسي طبعا ما أنا كنت فاضيه بأه

بس تعرفوا الفتره دي علمتني كتير اوي يعني مقتصرتش بس

ع الانجازات دي ,علمتني ان اي واحد في يوم من الايام فكر انه

يترك وسط معين فعايزة اقوله اوعاك ترمي كل المسؤليه علي

الوسط انا معاك ان الوسط ممكن يكون سيء للغايه لكن كمان

العيب كله مش في الوسط احنا علينا مسؤليه كبيره اوي

تعرفوا احنا لما بندخل وسط ونندمج فيه جامد اوي مش بنبقي

حاسين بالي بنعمله وهنحس ازاي اذا مكناش بنحاسب نفسنا

ونقعد ونفكر في كل خطوه بنعملها بنصحي من النوم نخلص شغلنا

ونقعد ع الجهاز ونقوم من ع الجهاز ننام عمرك قعدت مع نفسك

وفكرت وقلت النهارده انا عملت كذا وكذا ومكنيش ينفع أعمل كذا

, عمرك مسكت ورقه وقلم وكتبت فيها كل سلبياتك وايجابياتك

في يومك أقولكم خلاصه الموضوع غلطلتنا في حاجتين

الاولي : عدم محاسبة النفس ..اذا نسيت دي والله هتضيع وعمرك

ماهتتغير ولا ترتفع ابدا كان الدكتر احمد حبيب دايما يقولنا

المحاسبة هي دم التغير اوعي تسيب نفسك للشيطان يببر لها

ويقودها لأ انت اتحكم في نفسك وحاسبها واستحمل ياعم

وتعالي ع نفسك شويه وشد علليها انت ليك كيان اوعي تسمح

لأي حد يتحكم في كيانك ومشي الدنيا ع مزاجك وأوعي تخليها

تمشيك وتقول أصل الدنيا ماشيه كدا ياجماعه دي اتخلت ليك

ايوا ليك انت مش كدا ؟ أه ...كدا ونص وخمسه كمان

ثانيا : انك بتدخل لواحدك ..يعني ايه بأه ان شاء الله ؟يعني لازم يكون

معاك صحبه صالحه في الوسط او من خارج الوسط لكن يكون معاك

وعارف كل الي انت بتعمله لو جيت تقع يشدك ويرفعك تاني غلطنا

ياجماعه اننا بندخل ونقول لأ أوعي دا انا لايمكن اقع دا انا وانا وانا لحد

مانقع ودي طبيعه النفس البشريه ومش غلط اننا نغلط لكن الغلط

كل الغلط اننا نستمر بالخطأ اوعي تدخل لوحدك حتي لوقالوا

لك ان في ناس كويسين لكن انت متعرفشهم خلي معاك حد

تثق فيه حد راجل بجد صحبه صالحه تنجيك ولو غلط هتضربك

ع راسك وتقولك فوق احيانا الضربة بتكون قاسيه اوي لكن

مش بنعرف قيمتها غير لما الالم يروح تعرفوا ..كانوا زمان بيداوا

الجرح بالكي تفكركوا مكنوش عارفين ألم الكي دا ايه ؟ لأ طبعا

عارفين لكن بيستحملوا لأنهم عارفين انه هيداويلهم الجرح ..

دور ع صحبة تكون وسطها واعلي منك علشان ترفعك لفوق ..

انا الحمد لله خرجت من الفتره دي وانا أكثر ثقه في الله

وفي نفسي بدخل كدا بقلب جامد وأتكلم مع أي حد بروح

واثقه جدا الحمد لله ..فخورة جدا باللي بعمله وبمنهجي

ومستشعره عِظَم الحسنات ...حاسه الحمد لله بتوفيق

ربنا ليا من اول خطوه بدأتها لحد الوقتي وبجد لمسته في مواقف

كتير علمتني الثبات واليقين والصبر ع البلاء الحمد لله احنا بس نخلص

العمل لله وإجري لربنا هيهرول ليك وعلي صوتك وقول

"وعجلت اليكَ ربِ لترضي "

أنا خلصت ياجماعه بس أرجوكم أي حد تعب واتخنق او حتي

مش تعبان وحاسس انه ماشي تمام او الي متردد في حاجه ..

الله يكرمك فكروا مع نفسك وقَوِِمُوها وخليك فاكر دايما ان

حساب النفس في الدنيا بيعمل 3 حاجات : 1)بينبهك لأخطاءك

أول بأول ويمنع فشلك وبيرفعك جامد اوي وأكسب بأه ياسيدي

الراحه النفسيه ولذة النجاح . 2)بيخفف من حساب الله لك في الاخره

3) هيقربك من ربنا اوي وساعتها استشعر حلاوة القرب من ربنا

وأبقي أدعيلي ..وأوعاك تنسي الصحبه الصالحه

ياجماعه والله بحبكم لكن نفسي نمسك في ادين بعض ونفوق

لأن عمر ما الامه هتتصلح بشباب غافل وعمر ما الاقصي هيرجع

بيه وعمره ما هيكون ليه شرف الجهاد في سيبل الله ولا حتي

الاستشهاد لأنه مايستحقهاش الله يخليك فوق وابدا بالدعاء

وخد خطوه عمليه انا عارفه الموضوع صعب لكن اذا عرفت

نتيجتة والله ماهتسيبه يلا يقوم وادعي ودور ع صحبه وأطلع

من نفسك ولو ليوم فاهم يعني ايه ؟ محدش معصوم من الخطأ وانت

لو مش حاسس انك خطأ تبقي المصيبه الكبيرة ؟ تبقي غافل ايوا

انت يلا قوم وصلي وادعي وابدا خطوه جديده ومتنساش اول ايه

عنيك تنزل عليها تبقي تقولنا عليها .... أه عايز تعرف الايه بتاعتي ايه ؟

لأ مش هقولك أصلها كانت صعبه اوي بس ان شاء الله بتعاتك

هتكون جميله اوي يلا وفرحنا معاك وأصلح ما بينك وبين الله

يصلح مابينك وبين الناس ومترددتش ..انت ليه متردد؟

ياعم دا من ترك شيء من اجل الله ابدله الله خير منه يلا بأه ومتبأش

رخم وهات ورقه وقلم وعيد حساباتك وحط قدامك

" الإثمُ ماحاك في صدرك وخفت ان يطلع عليه غيرك "

خليك صريح اوي محدش معاك انت لوحدك وبس وتعالي ع نفسك

شوية معلش انا عارفه اني رخمه وخنقه لكن والله نفسي تحس

بالاحساس الي انا حسيته إحساس كدا ............!

ولا اقولك مش قايله عامل ازاي

جربه وانت هتعرفه وابقي قابلني لو عرفت توصفه اصلا

صحيح مقلوناش الورقه السادسه كان فيها ايه انا اقولكم كلمتين

كدا يعني علي أد ما اُوسم كانوا من قلبي في قتره تعبي يارب

احساسها يوصل لكل اليكتبتها علشانهم

" وعــــــدت لكـــم أنا "

عدت لكم وعودتي نصر كبير

نصر رُغمَ أحزاني وألامــــي لكنه رفع الجبيــــــن

رفـــــــــعَ روحــــاً لايــــــــــــزال بــها الـــــــــيقين

الحــمــــــــد لله لطــالمــــا كان الإلهُ هو المعيــــــن

أملي لديك بأن تثبتنا إلهي وتبعدَعنا كل شيطان رجيم

أملي لديك أن ترشدَكل من حاد عن الطريقِ المستقيم

كــــل من تنــــــاســي عن فعله ونسيََّ أنك رقيبٌ عليم

أملــــي لديك بصـــــحوةِ تعـــودُ بــها قلــوبُ الغافلــين

حتي وان تنــــاستهـــــم جميـــــعُ أعيــــنِ المحبيــــــن

حتي وان تاهت هي الاخري وصار دربها درب الخاطئين

ستبقي قلوبنا تمضي اليك تحمل همها ودمعها فوقَ الجبين

لتعـــــــودَ بنــــورِ إيمانــــكَ تجلـــــو ظلمةَ القلبِ الحــزين

وتحـــوله عــزماً وإصراراً وروحاَ ثقتــــــها بربٍ العالمين

ربٌ هو الرحمنُ جلَ جلاله ماكفَ يوماً نادماً بل وواعده بجنةٍ ونعيم

أمــــــلي لديكـــــم أن تفيـــقــــوا وتـــرجعوا العهــدَ القديـــــم

لــــمَ لم تعودوا مثلما كنــــتم أغــــاب عنكمُ النهجُ القـــويم

أغـــابت صحبةٌ لقــــاؤها تحـــتَ العــــرشِ يـــومَ الـــــدين

بــــاللهِ مـــــاذا تـــــركتــــم فتــــأخـرَ النصـــــرُ المبــــــــين

عفـــــــواً ,,, إن كـــــانت أحـــرفـــي قـــد فجـــرت ألمــــــاَ

لكنهــــــــا والله أمـــــلٌ بأن نعود ....... لربٍ رحيــــــم

كلمات /

أختـــ Rima ــكــم

استنوا بأه الورقه 7 والـ 8 والـ 9 قريبـــــا

ادعولي بالله عليكم بالثبات والاخلاص والتقوي والخشوع ومش

عايزه أي حد يزعل مني ابدا لأي تصرف هعمله او عملته معاه وبعتذر لكل الي

غبت عنهم بس أكيد هيعذروني ومستنيه حد معايا ع نفس الطريق

ناخد بأدين بعض كدا ... لسه كلمه واحده بس

أني أحبكم في الله ويشهد الله علي مافي قلبي

لكم مني كل الحب والتقديــــر

أختـــ Rima ــكــم

ياباي دي لكاكه لك فظيع ربنا يكون في عونه