حوارخاص::مع الطبيب المجاهد (( د/ ميسرة قدري ))

بسم الله الرحمن الرحيم

سلام الله عليكم ورحمة وبركاته

حياكم الله

يقول تعالي : [ إِنَّ اللّهَ اشْتَرَى مِنَ الْمُؤْمِنِينَ أَنفُسَهُمْ وَأَمْوَالَهُم بِأَنَّ لَهُمُ الجَنَّةَ ]
أظهرت لنا ايام الحرب علي غزة معادن المجاهدين والمرابطين الصامدين علي
ارض غزة الاباء ...رجال صدقوا ماعهدوا الله عليه فصدقهم الله في وعده
ونصرهم وايدهم بكلمة الحق في كل بقاع الارض ...
ولــكن كما رأينا جهادهم وتضحيتهم رأينا ايضــا اناس من بيننا كانت لهـم
بصمات في هذه الايـــام ...حاولوا تقديم كل مايستطيعون في سيبل رفع كلمه
الاسلام عاليا ... فحاولنا التقرب منهم والتحدث اليهم علهم ينقــلون لنا بعض
النفحات من ارض غزة ....... التي حملنا جميعا ان تطأ أقدامنا اياها
يوما من الايــام ......!! فكان لنا لقاء مع..... احد الاطباء المصريين
الذين كتب الله لهم ان يجاهدوا بعلمهم ويشاركوا اخوانهم ماعانوه
في ارض غــزة ....كان لنا حوار مع الطبيب / ميسره قدري ...
تخصص جراجه الفم والاسنان (( طلخا _دقهلية ))
الذي تواجد بمستشفي الشفاء اثناء الهجوم الصهيوني علي غـــــزة ...
بعد عودتة من هناك
كان لنا معه حديث لينقل لنا بعضا من المعاني التي عاشها في تلك الايام ..

** ** **


ملاحظـــــة ::
نقلنا لكم الموضوع بالعـــامية ..كمـــا أخذناه من طبيبنا ...وكما ااحتفظ بكل
المعاني التي خرجت تلقائيا تصف كل شعور عاشه الطبيب بتلك الايام ....فربما
تكون هناك صعوبة في القراءه ولكنها يسيره باذن الله تعالي.. .. ..

** ** **


((...بسم الله الرحمن الرحيم...))

بنرحب بحضرتك يادكتر ... وحمد لله علي السلام وربنا يتقبل منكم ان شاء الله ويجعله في ميزان حسناتكم....مبدئيا عايزين حضرتك تكملنا عن بداية الفكــــرة .... ؟

بسم الله الرحمن الرحيم ... والصلاه والسلام علي اشرف الخلق محمد صلي الله علية وسلم.. طبعا بدايه الفكره جت مع
بدايه احداث غزة الواحد بدأ يحمل هم القضية ..وازاي اننا لازم نعمل حاجه فكان الواحد بيندفع انه يتحدث في المساجد
رغم انه مش بالـقدره الكامله انه يتكلم او يلقي خاطره لكن ازاي هتعمل حاجه زي كدا ؟ ربنا هيوفقني . !! كان الواحد
بيبقي همه انه بيتواجد في امـاكن فيها ناس كتيروفي نفس الوقت مش قادر اني اوصل الرساله ... فكان الواحد خلاص
بيتوكل علي ربنا وان شاء الله ربنا مــش هيخذلني ويبدأ الحديث .. .. ..وفعلا كان الحمدلله ربنا بيوفقنا ويفتح لينا كل
ابواب اليسر . لكن بعد الخطوه دي هعمل ايه مش معقوله دوري هيقتصر علي كدا وبس .. .. .فبدأت التفكير في حملات
الاطباء وبالفعل قررت المشاركه فيها ...والحمد لله ربنا يسر لينا الامور بشكل غير طبيعي احنا لحد الوقتي مش عارفين
ازاي ؟؟ فالواحد لو شال هم القضية فعلا واستشعر انه لازم يقدم حاجه ولازم يضحي ... ويصدق النيه اوي اوي مع ربنا
ومع نفسه ويخلص في العمل علي قدر مايشاء وطالما صدق ربنا فلازم يكون عنده يقين ان ربنا هيصدقه.

** ** **
* حضرتك عشت في مجتمع الكثير بيتمني انه يعيش فيه زأكيد في مظاهر طيبة لهذا المجتمع كانت احدي عوامل تكوين شخصية مجاهدين كمجاهدين غزة ؟

** بالنسبة للمجتمع الحقيقه كان لية مظاهر مبهره جدا والواحد فوجيء بيها ..
يعني هل في مجتمع فعلا عايش بالشكل داولو احنا قعدنا كدا نعدد بعض
الحاجات اللي لفتت نظر الواحد ::

- المجتمع العادي بأكمله ملتف حول المقاومة وكأن 1.5 مليون مقاومةإلا نسبة بسيطه جدا ممكن تقول حوالي 5% عملاء ولو قلنا الناس الي ملهمش في حاجه 15 %

- كرم الناس هناك غير طبيبعي ...يعني انا لا اذكر اني دفعت مبالغ تذكر أبدا هناك وكنا اخر يوم بناكل ع الشموع
وكنت تلاقي سفره كامله ..وكنا اصلا بنغسل ايدينا بالعافيه يعني صراحه كرم وبركه عالين اوي

- هناك المساجد في كل الصلوات ممتلئه ... من أطفال وشباب وشيوخ ... ومكنش حد يطلع من المسجد غير بعد السنة والختام واتمام الصلاه ع اكمل وجهه

- لفت انتباهي عدد المساجد الهائل الي بتحفظ القرآن وعدد الاطفال الي بيتواجدوا فيها كثافة اطفال ماشاء الله
عاليه جدا والتحفيظ عن طريق برامج كامله خلال شهرين يكونوا خاتمين فيها القرآن ...وهناك اهتمام بالامور دي عالي جدا

- من مظاهر المجتمع كمان اننا لا اتذكر اني شفت شاب حاطت " جيل " وواقف في شارع ولا الكلام الفاضي دا ابدا

- البنات.... هناك المشهد الوحيد الي شفناهم فيه كانوا بيزورا المرضي ومعاهم ورد وفي كامل زيهم الاسلامي
واحترامهم يعني احنا مشفناش تقريبا اي منهم بدون حجاب وكانوا بيناموا بكامل لبسهم وحجابهم حتي اذا حصل اي قصف وأصيبوا او استشهدوا يكونوا مستورين

- الاعلانات في الشوراع .. مفيش حاجه اسمها اعلان عن فيلم ولاشامبو ولا .... كلها اعلانات ( حمساوي وفتحاوي و...) وبكتيرها اوي اعلان عن موبيل

- من مظاهر التكافل الرائعه بالمجتمع الغزاوي انك وانت رايح عزاء الشهيد انت مش رايح تعزي ,,انت رايح تهني وتاكل
تمر وتشرب قهوة وتمشي ..وفرحه غير طبيعه بالشهيد وتلاقي ابن الشهيد قاعد مع اي حد وخلاص هيتربي في وسط
أي بيت ومفيش مشاكل

- من أجمل مظاهر التكافل موقف حصل لنا واحنا راكبين السياره ..فأخونا بيرجع بالسياره بظهره خبطت في الي واراها والسياره الي ورانا اتبهدلت وتلاقيه بيقولك خلاص ياخيي اتوكل ع الله حصل خير
(( تخيل الموقف دا لو حصل هنا بنعمل ايه ؟؟ ))

- هناك مفيش بيت إلا وفيه إما مجاهد او شهيـــد أو معتقــل أو مرابط ..ومفيش حاجه اسمها شعب وحرب ..

- من مظاهر التعاون مع المقاومة ..انهم كانوا بيتركوا البيوت بما فيها للمجاهدين للحمايه والمواجهه ولعلمهم انها هتُهدم سواء من العدو او من المقاومة نفسها أثناء المواجهات ورغم ان في بيوت علي مستوي عالي جدا ومع ذلك كانوا بيخرجوا ويتركوها للمقاومين..

- بعض البيوت هناك لنـــاس درجاتهم عاليه جدا " وكيل وزارة ... عضو مجلس تشريعي ...رئيس وزراء .."
وتلاقيها في بساطة شديده ..وأثاث بسيط ..وديكور بسيط وماتحسش انها خاصه بأصحاب هذه المناصب
- هناك تحس وانت في وسطهم بأمان وأمن رهيب ... وتمسك بقيم الاسلام كبيرها وصغيرها ..اتذكر موقف اننا كنا نزلين نصلي الظهر وبعدين نزلنا من السيارة والاخ الي معانا بيقفلها ..فأخونا الغزاوي بيقوله انت بتعمل ايه احنا مش بنقفل سيارتنا ورحنا صلينا ورجعنا والسياره مفتوحه ...
(( كمان تخيل الموقف دا عندنا ))

والله الواحد لو قعد يعدد مظاهر المجتمع مش هنوفيها لكن فعلا هو مجتمع امتداد لعهد الخلفاء ونموذج رائع للمجتع الاسلامي
كل ظاهره فيه وكل تعامل بسيط بيوضح لينا أسباب ووجود غزة في المحنة دي وليه غزة بالتحديد وفلسطين كلها مستهدفه
علي مر التاريخ

** ** **
بعد قضاء الدكتور 12 يوم بأرض غزة ؛هل خطر بذهن حضرتك أفكار جديده لتنميه وتطوير أدائنا وعملنا هنا سواء علي مستوي الفرد او المجتمع ؟

- هو فقط سؤال كان بيدور بذهني ..اننا الوقتي جماعة قائمة علي حفظ الدين والدعوة ..وهؤلاء الناس احنا امتداد ليهم..دول خط مواجهه واحنا وراهم ..فلابد اننا نكون علي نفس المستوي ..لأننا المفروض بنتبع نفس الفكر فــ ليه احنا من زيهم ..الواحد كان بيسأل نفسه ..هل عنده استعداد انه بيته يُهدم في لحظه ويفقد ابناؤه ويٌقتل كل افراد اسرته ..وهو لايصاب بجزع ..هل الواحد جهز نفسه لنظقه زي دي ؟؟هل الواحد فعلا وصل للدرجه الي تخلي ربنا سبحانه وتعالي يصطفيه كشهيد او مجاهد ؟؟

- النقطه التانيه :: المقترح الي كان بذهني ..اننا نعيش مع اخوانا هذا المعني من الرباط ..اخوانا هناك الواحد منهم
بيقضي 5,7 ساعات في شغله أو دراسته وبقية الــ24 ساعه مرابط ..فــ ليه احنا لانحي معهم هذا المعني من الرباط ؟؟
يعني انا أخلص شغلي وبقية يومي مهموم بالقضية.!! وأكون مرابط طول النهار لقضيتي ودعوتي وديني ..
هو احنا بنعمل ايه اصلا للدعوة ؟؟ يعني صراحة احنا بنقضي مع الدعوة كل يوم ..شيء أقل من القليل ..
لايساوي شيء أمام رباط اخوانا وجهادهم هناك ..فالواحد فعلا شاف انه لازم يعيش المعني دا هنـــا .

** ** **
وراء كل مجـــاهد عظيــم ..مُجَاهِده عظيمــة !! تعليق حضرتك ؟؟

لا تعليق ....!! الحقيقه الواحد مش عارف يقول ايه ؟؟ لكن ربنا يكرمها زوجتي من البدايه مكنش في اي معارضه او معوقات ..
بل بالعكس كان في دفع وحماس ..وطول الوقت كانت تثبتني دايمــا وتذكرني بدعــاء
" اللهم اهدي نفسي واخسأ شيطاني واسلل سخيمة قلبي ...."حتي لما أخذنا قرار الرجوع لقيت الرد الي اثلج صدري حقيقة
" انت خلصت الي وراك ..؟" فيعني ربنا يكرمها ويحفظها ان شاء الله .

** ** **
أروع الموقف الروحانيــه الي عاشها الدكتور ؟؟

أروع الروحانيات كانت في الايام الاولي لينا هناك...احنا كنا نجهش بالبكاء في الصلوات يعني كان شعور طبعا لايوصف ..
بعد كدا احنا لما رحنا مستشفي الشفاء كان في أعداد كبيره جدا من الاطباء ومن الحاجات الجميله انك تلاقي اساتذه
ودكاتره علي مستوي العالم وتخصصاتهم عاليه جدا ونايمين علي الارض والفرش ..وروح حب عاليه جدا بتجمعهم ..
والموقف الروحاني الجميل اوي اننا كنا نصحي قبل الفجر كنا نلاقي كل الناس علي مختلف اجناسها قايمة ..
ونصلي وندعي وكانت الاصوات نفسها الي بتصلي بينا بتشعرك بجو روحاني غير طبيعي وعالي جدا جدا جدا

** ** **
كلمــة يوجههـــا الدكتور للطـــــــلاب ..؟

انا بستغرب اوي من الطالب الي بيقول (( اننا علي ما أكبر وابقي دكتور علشان ادخل غزة هيكون موضوع غزة انتهي و....))
هي قصه الاسلام وقصه الخلافه مش بس في غزة دا احنا شايفين غزة الوقتي فقط كنموذج واحداثها فرضت نفسها علينا ..لكن في كل بقاع الارض في قضايا أكبر من كدا كمان ..وبعدين المسلم لازم يكون هدفه واضح جدا إما الوقتي او بعد ميلون سنه في النهايه ..هو عايز يرضي ربنا وينال الجنه وفي نفس الوقت ينصر حق عباد الله المستضعفين في الارض فإذا حتي قضية غزة انتهت الوقتي في مائة غزة جايه والقضية بين الحق والباطل قائمة الي يوم القيامة ..فأنت كطالب لازم تكون متفوق في مجالك ومتميز فيه علي اساس لما المكان يحتاج لك ..تقدر تقدم فيه ...ومش بس محتاجين أطباء ....دا احنا محتاجين (( أطباء ومهندسين وعمال سباكة وبناء وممرضين ...)) فأنت كطالب في اي مجال تقدر تقدم حاجه ..لأ دا انت تقدر تقدم كتير .
...... لكن عد نفسك للجهــاد بعلمك

** ** **
أبرز المعوقات الي واجهتكم في الايام الاولي بعد دخولكم غزة ...؟؟

أبرز العقبات الي واجهتنا مش بس بعد دخولنا ..لأ دا من بداية الرحله كلهــا كانت ::
- النفـــس - الهــــوي - الشيطـــان - التعلق بالدنيا
أوعوا حد يفتكر ان مواجهه العدو دا شيء صعب بالعكس دا اسهل شيء في الموضوع ..لكن اصعب شيء فعلا انك ازاي تتغلب علي هواك ونفسك وتترك تعلقك بالدنيا ..اخونا هناك مش هنقول الدنيا اخر حسابتهم ..لأ دي مش في حسابتهم اصلا ..احنا في اول الايام هناك ...من المناظر والاصابات والجثث الي شفناها ..بدأنا نفكر شكل جدي ..هل حد فينا عمل حسابه أنه يرجع معوق
او فاقد احد اطرافه او .. النقطه دي فعلاوقفنا عندها كتير جدا .. وبدأت نفس الواحد تحدثه انه ..((وأنا ايه الي وداني ؟؟طيب لو قعدت هتكون ظروفي ايه ؟؟ولو رجعت هترجع ازاي ؟؟ و......)) وكان طبعا الواحد يعيش مع تفكيره في كثير من الاوقات ولكن والله الحمد لله شعرنا بتثبيت ربنا لينا ..لأننا بعد الموضوع دا بدأت الاحداث تنصب علينا ..والشغل بيزيد والواحد بيدخل فـــيه ..لدرجه اننا مكنش عندنا فرصه اصلا ان الواحد يفكر في حاحه غير ان كل موقف بتمر بيه بيثبتك اكتر فالحمد لله تغلبنا عــلي النقطه دي ..وبدأنا نشعر بعظم المكان الي احنا موجودين فيه .. وبفضل الله تقريبا لم يعد لهذه العقبات اي مكان في قلب الانسان.

** ** **
بعد الاندماج في جو الرباط والمجاهدين ومعية الله سبحانه وتعالي ...كيف كان قرار العودة ...؟؟

- هو مبدئيا احنا اخدنا القرار لما مهمتنا هناك كأطباء انتهت وحالاتنا كانت حالات بسيطه ..يعني هو المفروض انك بتنقذ المصاب من الموت وبعدين بتبدأ تصلح من كسورةو...)) وكان هناك فريق اطباء فعلا علي خبره عاليه جدا ...وعلي قدر من تحمل المسؤليه كمان عالي اوي ...فتواجدنا هناك كان ظروف استثنائية وانتهائها كان أهل غزة أقدر علي تولي شؤنهم
لأنهم بلاشك الاعلم بيها ..وبيتبعوا من النظام والتدبير مايجعلهم قادرين علي ان يكفلوا أنفسهم ..

- النقطه التانيه ان الواحد خاف علي نفسه من الفتنه بعد كدا يعني محدش يعرف الظروف شكلها ايه وحتي بعد كدا اذا قررت
عدم الرجوع فممكن متعرفش ترجع ..فبدأ الواحد يوازن بين الامور ولقينا اننا فعلا ورانا مهمه كمان كبيره اوي هنا وفي المكان
الي ربنا أوجدنا فيه وأوجد أخوانا هناك فيه ...كل واحد مننا عنده مهمه ربنا سخره ليها هو أقدر انه يؤديها علي أكمل
وجهه من أي فرد اخر ....ومايجب علينا في كلتا الحالتين هو الاخلاص الشديد لله والمطلوب مننا اننا
نثبت هنا الاول في مكانا وبعدين نثبت هناك .

** ** **
مـــاذا اضافت الــ12 يومـــا في حيـــاة د/ ميســـرة ..........؟؟

- الواحد استشعر معيه الله بجد يعني احنا عشنا ايام شفنا فيها العديد من الشواهد الي بتبين مدي توفيق ربنا لينا وان فعلا
الامور باذن الله ستسير لكن ازاي احنا مكناش عارفين ؟ لمسنا تثبيت ربنا لقلوبنا في كل لحظه من بداية تفكيرنا في الموضوع الي رجوعنا ...وازاي ان الواحد فعلا لو صدق ربنا وأخلص نيته لله ربنا عمره مابيخذله لأن قدرته أعلي من كل شيء

- الفتره الي أنا قضتها هناك بفضل الله أكتسبت خبره كبيره جدا يعني اعتقد الواحد لو كان خدها هنا كان ممكن ياخدها في 4 , 5 شهور والحمد لله ربنا أكرمنا وقدرنا نقدم شيء
طبعا كل دا بعيدا عن كل الي اضافته الايام دي في شخصيه الانسان في كل جوانبها والي باذن الله سيترسخ ولن يضيع

** ** **
بالفتره الي حضرتك قضتها في غزة وخاصة في مستشفي الشفاء اختلط بالمجاهدين والمرابطين والصامدين من أهل غزة فلو حضرتك تكلمنا عن كرامات المجاهدين والصامدين بأرض غزة ؟؟

الحقيقة طول الفتره الي قضيناها هناك كان الواحد كل يوم بيشوف آية من آيات الله سبحانه وتعالي ...بتحيي في نفسك شعورك
انك فعلا علي ارض الرباط وانك وسط اشخاص صدق فيهم قول النبي صلي الله عليه وسلم " لَا تَزَالُ طَائِفَةٌ مِنْ أُمَّتِي عَلَى الْحَقِّ ظَاهِرِينَ لَعَدُوِّهِمْ قَاهِرِينَ لَا يَضُرُّهُمْ مَنْ خَالَفَهُمْ إِلَّا مَا أَصَابَهُمْ مِنْ لَأْوَاءَ حَتَّى يَأْتِيَهُمْ أَمْرُ اللَّهِ وَهُمْ كَذَلِكَ". قَالُوا: يَا رَسُولَ اللَّهِ، وَأَيْنَ هُمْ؟ قَالَ: "بِبَيْتِ الْمَقْدِسِ وَأَكْنَافِ بَيْتِ الْمَقْدِسِ "
ومن اول الايات الي لحظناها عند اول دخلولنا للمشفي ..

** اننا كنا بنعرف الشهيد او المجاهد من المصاب العادي ..بمجرد دخوله علينا ..وقبل مانعرف عنه اي معلومات ..
والله كنا نري النور في وجوههم ..بغض النظر طبعا عن نوع اصاباتهم وأمنياتهم وغيرة ...!!

** لا أتذكر ابدا اني سمعت مره واحده صرخات الم من اي منهم وكان بيدخل علينا اصابات رهيبه وغير طبيعه ومع ذلك
ماتسمع صوت ألم من المجاهدين والمصابين غير مثلا بعدها بثلاث ايام وهو بيبدل علي الجرح .... والله فعلا كنا
بنستشعر حنان ربنا سبحانه وتعالي وانه بيلمس بيد الرحمة علي جراحهم ..لدرجه اننا احيانا من صعوبة وبشاعه المناظر ..
لانستطيع الثبات ..وكانوا هم الي يثبتونا ...اتذكر موقف كنا وصلنا فيه لدرجه صعبه جدا من كثرة المناظر الي شفناها
وبعدين في أخ من اخوانا هناك ::
بيقولنا مالكم ..في ايه ؟؟
قلناله :: الاوضاع قاسيه والشهداء والنساء والاطفال ...
قالنا :: يا اخي قتلانا في الجنه وقتلاهم في النار !!
قلناله طيب والجرحي والاصابات والامكانيات ؟؟
قالنا :: يا اخي ما انتوا بتساعدونا وان شاء الله بتتدبر..!!
قلناله طيب والمنازل والدمار والمدارس و...
قالي :: يااخي الي بناها يبنيها تاني ..!! يا اخي عادي اثبتوا .... وان شاء الله النصـر عن قريب ...بس احنا نصبر ..!!

طبعا احنا كدا بنتكلم عن المواطنين العادين جدا الي انت ممكن تقابل منهم اي حد في اي مكان ....
فما بالكم بالمجاهدين والمرابطين ؟؟ الحمد لله ربنا يسرلنا وقدرلنا هناك اننا نجتمع مع بعض المجاهدين
ونتكلم معاهم ونسمع منهم ...!! طبعا مواقف تأييد ربنا سبحانه وتعالي لهم ...أكبر من ان عقولنا الصغيره تستوعبها ..!!
من بدايه الضباب الي كان بيحجبهم عن الجنود في معاركهم ..للكلب الي كان بيدخل يبحث عن المجاهدين ويقولوا له " ارجع فنحن جند الله " فيرجع الكلب ...للمجاهد الي كان بيواجه 50 دبابه لوحده ويهزمهم ... للرؤي الي كان المجاهدين بيشوفوها ...
للأم الي تدخل تتفقد ابنها الشهيد فترافقها سحابه وضباب حتي تدخل وتعود به دون ان يمسها ضرر ... !!
الكلام دا ياجماعه احنا اخدنا من افواه المجاهدين نفسهم لما قعدنا واتكمنا معاهم ..!!اما عننا لما كنا في مستشفي الشفاء وكان بيدخل لنا مصابين مجاهدين ونبدأ في العمليات وهما تحت تأثير البنج (( احنا هنا الي بيتكلم وهو في البنج بنقول عليه بيخرف )) دول كان كل كلامهم في البنج قـرآن وأذكـار ودعـاء كان الواحد منهم يسمع الاذان وهو في البنج !! ويقول لنا وقفوا خلونا نصلي ...طبعا الحاجات دي معظمها متصور فيديو وان شاء الله بتشوفوها معانا ...!!

ملحوظـــة ::
(( بالفعل رأينا الفيديوهات وشاهدنا اثناء تواجدنا مع الطبيب ويتم الان تعديلها
وعمل مونتاج لها لتكون جاهزة لعرضها عليكم باذن الله هنا في صفحات المدونة ))

** ** **
دكتور ميسرة ..احنا بنشكر حضرتك جدا علي الوقت الي حضرتك سمحتلنا بيه وعلي المعني الرائع الي حضرتك نقلتهلنا ونسأل الله سبحانه وتعالي ان يتقبـــل منكم وان يرزقكم الاخلاص والتقـــوي ويكتب لنا جميعا رباطا علي ارض غزة وصلاه في أكناف المسجد الاقصي واستشهادا في سيبل الله لتحريرهما ... جزاكم الله خيــرا كثيــرا ..وجعله الله في ميزان حسناتكم اللهـــم آمين .... اللهم آميـــــن
** ** **

قـــام بالحــــوار :: Rima Alqsamia
بنقـــابة العلميــــن بالدقهــــلية
أختــ Rima ـــكم

** ** **
هنـــا تجدون ملف الحوار كاملا مع كامل النسيقات
للتحميل [...اضغط هنــــا ...]
** ** **
ولاتنســـونا من صالح دعائــــــــــــكم
ولاتنســــــــــوا اخوانكم بغــــــــــزة من الدعــــــــاء
وصلوا علي اشـــــرف الخلق محمد صلي الله عليه وسلم